Nadom Pepeling Anak Adam Naskah Lengkap
Anak Adam anjeun di dunya ngumbara * Umur anjeun di dunya teh moal lila
Anak Adam umur anjeun teh ngurangan * saban poe, saban peuting dicontangan
Anak Adam anjeun paeh teh nyorangan * Cul anak, cul salaki, cul babarangan
Anak Adam paeh euweuh nu dibawa * ngan asiwung jeung boeh anu dibawa
Anak Adam pasaran teh lolongseran * saban poe, saban peuting gegeroan
Anak Adam anjeun kaluar ti imah * di garotong dina pasaran nu genah
Aduh bapa, aduh ibu abdi keueung * rup ku padung, rap ku lemah abdi sieun
Anak Adam di kubur teh poek pisan* nu nyaangan di kubur teh maca Qur’an
Anak Adam paeh anjeun ditakonan * Malaikat Munkar, Nakir nu nakonan
Anak Adam mun teu bisa ngawalonan * ka malaikat nu dua nu nakonan
Anak Adam tangtu keuna eta gendir * paneunggeulna malaikat Munkar Nakir
Anak Adam lamun amal urang alus * eta tangtu dikubur teh leuwih mulus
Anak Adam sing garetol maca Qur’an * pidamareun di kubur teh maca Qur’an
Anak Adam kaluar ti alam barjah * waktuna teh dina saba’da qiyamah
Nyaeta dina tiupan nu kadua * nu dingaranan paniup ba’as tea
Anak Adam urang sangges dihirupan * tuluy digiring ka tempat lan deratan
Pirang-pirang aleutan nu rupa-rupa * sakumaha waktuna hirup didunya
Anak Adam aya anu rupa bagong * waktu hirupna didunya teh bedegong
Anak Adam waktu anjeun keur ditimbang * mun beurat ka kenca tangtu kana jungkrang
Kitu deui lamun beurat ka katuhu * eta meunang kabungahan anu tangtu
Dulur-dulur abdi sakiyeu wasiyat * pamugi iyeu nadoman janten hikmat
Anak Adam ari maot eta lawang * sakabehna jalma-jalma pada nyorang
Anak Adam ari maot teh inuman * sakur-sakur jalma pada ngaraosan
Anak Adam dawuh Alloh maneh dijieun * taya liyan pakeun ibadah lakonan
Anak Adam maneh ulah ka tungkulkeun * kana dunya sabab bakal ditinggalkeun
Anak Adam maneh ngalakonan dosa! * saha anu nyalametkeun tina siksa?
Maneh lamun ngarep-ngarep rohmat Kami * kudu pisan netepan bakti ka Kami
Rejeung maneh mun sieun tina siksaan * eta kudu tina doraka jauhan
Reujeung maneh sok era ku pada jalma * henteu sieun ku Alloh sakama-kama
Anak Adam ulah poho kana maot * karana ari maot ka anjeun pogot
Geuning maneh ayeuna keur mapay jalan * tangtu anjeun nepi kana panungtungan
Anak Adam pek pigawe amal hade * karana nu jadi konci surga engke
Reujeung tinggalkeun sagala kagorengan * sabab jadi konci naraka siksaan
Anak Adam gedong-gedong nu di dunya * nu ku anjeun di jeiun di reka-reka
Pasti pisan ku anjeun teh ditinggalkeun * jadi ka anjeun mantak nganalangsakeun
Anjeun pindah ti dunya ka pakuburan * Dina pakuburan tangtu di sampakeun
Lamun boga amal soleh tangtu bungah * lamun mawa dosa tangtunage susah
Pakuburan mungguh kajalma nu soleh * ka sebutkeun “roudotun minal jannah”
Ari hartos nateh patamannan surga * mungguh kanu doraka ruang naraka
Anak Adam ari nu ngawungkul dunya * tangtu hirupna didunya hayang lila
Anak Adam ari jalma anu resep ka akherat * di dunyana tangtu sono kana maot
Iyeu nadom pepeling reujeung wasiat * nu kadua rek disambung deui mapat
Anak Adam anjeun kudu daek tobat * karana tobat jadi konci ibadat
Lamun jalma henteu ngalakonan tobat * moal bageur ka Alloh migawe “tho’at”
Ari ngarah bisa tobat kudu dipikat * nyaeta ku loba eling kana maot
Anak Adam urang ulah ka jongjonan * hirup didunya ku ngurus kadunyaan
Masing eling kana bangana hisaban * diakherat komo mun nyorang siksaan
Jeung elingkeun kana siksa pakuburan * kanu boga dosa henteu ditobatan
Saha-saha jalma anu daek tobat * eta tangtu di akherat na salamet
Reujeung tantu moal salah pangbalikan * nyaeta ka surga tempat kani’matan
Sing kasebut “kebo mulih pakandangan” * baheula urang di dunya kadudukan
Mun teu kitu tangtu balikna kasarung * ka tempat siksaan tangtuna kaduhung
Dawuh Alloh saha nu eling ka Kami * sarta dibarengan ibadah ka Kami
Tangtu kami mi’asih ka eta jalma * jeung di rohmat ku Kami di dama-dama
Anu eling ka kami bari doraka * ku Kami di bendu asup kana raka
Prak geura bakti ka kami reujeung tinggal * tina sakabeh dosa bari tawakkal
Anak Adam anjeung geura babahanan * pikeun balik nyaeta amal-amalan
Dunya anjeun geura hutangkeun ka Alloh * ku rupa sidekah jeung amal jariyah
Reujeung ikhlas di barengan rido manah * supaya di tarima ku gusti Alloh
Engke ka tampa ku anjeun di akherat * bayaran ti Gusti Alloh mang lipat-lipat
Kani’matan surga eta salawasna * moal anggeus jeung moal aya tungtungna
Saha-saha anu tobat jeung ibadah * di asupkeun kana surga leuwih bungah
Anak Adam anu ngora meungpeung ngora * prak ibadah supaya untung pohara
Komo nu geus kolot masing tambah pogot * sabab bakal tereh nyorang kana maot
Tapi kade bisi henteu boga elmu * jadi lapur ibadah moal tinemu
Ilmu nu tilu perkara masing bisa * masing ngarti ulah make asa-asa
Hiji ilmu tauhid nu kaduana * Ilmu fiqih, tasouf nu katiluna
Ilmu tauhid nu mingpin patekadan * ilmu fiqih ngajaga ibadah badan
Ilmu tasouf pikeun ibadah ati * pikeun mereskeun sakabeh pangabakti
Anak Adam iyeu aya panerangan * Pikeun padoman ciri bakal kabagjaan
Didunya jeung di akherat sakabehna * Sabelas perkara anu kahijina
Jalma anu kana dunya henteu pogot * Resep ka akherat sabab bakal maot
Dua teguh ibadah jeung maca Qur’an * Tilu tara loba omong pangangguran
Opat kacida ngaraksa kana solat * anu fardu reujeung anu sunat-sunat
Lima jalma apik dina sandang pangan * Barang-barang anu haram sok disingkahan
Kagenepna osok daek sosobatan * Rejeung jalma nu sholeh silih asihan
Tujuh handap asor tara kumulunggung * Henteu Kumagungan teu ngarasa luhung
Kadalapan ku rizqina sok berehan * kanu miskin kanu faqir karunyaan
Salapan ka mahluk-mahluk mikanyaah * sok nyieun ka manfaatan jeung faidah
Sapuluh ka batur-batur mere bungah * kanu keur kasusahan sok milu susah
Kasabelas loba eling kana maot * sabab urang tina maot moal lepot
Lalawanan nu sabelas eta ciri * bakal cilaka tumerap kana diri
Anak Adam dawuh nabi saha Jalma * anu tungtungna omongan nu utami
Kaluar ti dunya nu ucapan nana * “Laa ilaaha illalloh” enggeus tangtuna
Asup kana surga anu moal salah * dulur-dulur mugi pisan ulah gaplah
Masing loba macana eta kalimah * mugi-mugi urang sing “khusnul khotimah”
Reujeung deui sing loba maca sholawat * Ka kangjeng nabi nu kagungan syafaat
Karana ari loba maca sholawat * matak nepi kana “makomul ma’rifat”
Reujeung matak jadi du’a di ijabah * ku Alloh anu kagungan sifat rohmat
Anak Adam ayeuna keur maju jalan * Sarereya ngaburu kana wekasan
Jalan eta ayana dua perkara * jalan kana bagja jeung kana cilaka
Jalan bagja kalakuan ka Islaman * cilakamah kalakuan ka kufuran
Didunya jeung di akherat “aladdawam” * Mugi urang tetep di agama Islam
Amin, amin, amin “Ya robbal alamiin” * Amin, amin, amin “Ya robbal alamiin”
Anak Adam dawuhan Alloh Ta’ala * hadis qudsi anu pertela tur nyata
Nu hartosna dawuhan teh mun teu salah * ari maot teh nu mukakeun rasiah
Anak Adam nyakitu deui qiyamat * poe nu nembongkeun sagala rasiah
Nu di jieun rasiah mungguh manusa * dosa ka Alloh anu kawasa
Anak Adam tulisan anu mukakeun * Rasiah nu ku urang di sarumputkeun
Tulisan anu di buat malaikat * Roqib ‘Atid dua nana anu kuat
Anak Adam ulah osok mokahaan * Kana dosa anu leutik ngalakonan
Ulah ningal kana leutikna eta dosa * Sing paos dzat nu kawasa jeng nyiksa
Anak Adam ari dosa leutik eta * mun teu geuwat di tobatan osok menta
Kana wani ngalakonan dosa gede * Tobatan ku anjeun masing hade-hade
Anak Adam mun teu geuwat di tobatan * sok narik kufur jeung goreng na wekasan
Abdi sadayana nyuhunkeun diraksa * ka dzat Alloh anu murba nu wisesa
Anak Adam anjeun kudu sing rumasa * di damel ku dzat Alloh anu kawasa
Tuluy ku alloh dipasihan amanat * poma pisan anjeun ulah rek khianat
Anak Adam panon anjeun kudu diriksa * tina ningali nu matak jadi dosa
Nyakitu deui pangambung reujeung cangkem * kudu jaga saban poe saban malem
Anak Adam sampean kudu lempangkeun * kana tempat pangajian ngarungukeun
Cepil anggo nangkep kana penerangan * panangan anu di anggo tutulisan
Anak Adam iyeu pepeling cantumkeun * dina embun-embunan pek dipageuhkeun
Simpen dina kolbu masing ati-ati * malah mandar tambah harti reujeung surti
Sim kuring neja rek nuluykeun pepeling * bari muntang ka dat tunggla nu ngagiring
Adak Adam sakaabeh bakal digiring * ku Alloh kana tempatna masing-masing
Karana dina eta poe kiyamat * mahluq teh ngan dua pantan moal salah
Sapantan na anu jadi ahli surga * nu sapantan ahli naraka dijaga
Anak Adam nu iman Islam ka Alloh * nu geus ka asup kana perjangjian Alloh
Didawuhkeun iyeu jangji dina Qur’an * nu hartosna mun teu salah ngama’naan
Digiringkeun jalma-jalma kapangeran * ngadeuheusna di sawarga berhadepan
Malah tatkala daratang ka sawarga * terus pintu dibukaan kunu jaga
Lajeung disambut ku malaikat Ridwan * diriwayatkeun ku Alloh dina Qur’an
Nyaeta “salamun alaikum” kawitna * “tibtum fadkhuluha kholidin” terasna
Anak Adam galibna di alam dunya * mun panganten di sawer, di mulya-mulya
Dawuhan ti Alloh anu tadi tea * ibarat panyawer pangantenan mulya
Anak Adam nu cilaka nu doraka * digiringkeu ku Alloh kana Naraka
Nyaeta nu jadi panganten kadua * nu paehna imanna henteu kabawa
Sanggeus daratang kana Naraka sakabehna * tuluy dibukaan sakabeh pintuna
Anak Adam diweweleh ku pencaga * jenengan Malaikat Malik nu tohaga
Nu geus di dawuhkeun ku Alloh ayatna * dina Qur’an nu geus di bantun simbulna
Ari maraneh kabeh pangna disiksa * sabab teu nurut ka Rosul nu ngaraksa
Di dunya geus diajak tauhiid ka Alloh * jeung ibadah batan nurut kalah mangleuh
Tah eta tempat aranjeun teh naraka * siksa Alloh ku anjeun nu teu kasangka.
..: Tamat :..