Pupujian Nadom Maulid

بِسْمْ اللهِ الرَّحْمٰنِ الرَّحِيْمِ

نَظْمُ الْمَوْلِدِ

ڬُسْتِى اُوْرَاڠْ سَرَيْرَيْيَا ۞ كَڠْجۤڠْ نَبِى اَنُو مُلْيَا

مُحَمَّدْ جۤنۤڠَنْ نَنَا ۞ عَرَبْ قُرَيْشْ ۑَا بَڠْسَنَا

رَمَأنَا ڬُسْتِى عَبْدُ اللهْ ۞ اِبُوْنَا سِتِى آٰمِنَهْ

دِىْ بَبَرْكۤنْ نَا دِى مۤكَهْ ۞ وۤڠِى سۤنَيْنْ تَهُوْنْ ڬَاجَهْ

رَبِيْعُ الْاَوَّلْ بُوْلَانْ نَا ۞ نَڠْڬَالْ كَادُوَا بۤلَسْ نَا

اَفْرِيْلْ بُولَانْ مَسَيْهِي نَا ۞ تَڠْڬَالْ كَا دُوَا فُولُوهْ نَا

اَرِىْ بِيلَاڠَانْ تَهُونْ نَا ۞ لِمَا رَاتُوسْ چَرِيئَوسْ نَا

تُجُوهْ فُولُوهْ فَنَمْبِيهنَا ۞ سَرۤڠْ سَا هِجِى فُونْجُولْ نَا

سِتِى اٰمِنَةْ مِسَئُورْ ۞ وَقْتَوْسْ بَبَرْنَا كَا چَتُورْ

نِڠَالْ چَهْيَا مۤنِى ڠۤمْفُورْ ۞ دِى بُوْمِينَا هُورُوڠْ مَنْچُورْ

بَبَرْ تَيَا كَوْكَوْتَوْرَانْ ۞ اَوْرَوْكْ لِيْرْ كَيْڠِيْڠْ ۑۤفِيْتَانْ

سَوْچَا لِيْرْ كَيْڠِيْڠْ ۑِيْفَاتَانْ ۞ سَرْتَا هَارُومْ سۤسۤڠِيتَانْ

مۤدَالْ نَبِي اَخِيْرْ زَمَانْ ۞ فِيْرَاڠْ-فِيْرَاڠْ كَا اَنِيهَانْ

سۤسۤمْبَهَانْ بَڠْسَا شَيْطَانْ ۞ كَابَيْهْ فَدَا كَا رُوكْسَكَانْ

نَبِى يُوسْوَا لِمَا بُولَانْ ۞ تَوسْ تِيَاسَا اَڠْكَاتْ-اَڠْكَاتَانْ

يُوْسْوَانَا سَلَافَنْ بُولَانْ ۞ تَوسْ چَفَيْتَاڠْ سَسَئُورَانْ

يُوسْوَانَا سَفُولُوهْ بُولَانْ ۞ تِيَسَا اَمۤڠْ فَفَانَهَانْ

ڠَيْلَيْهْكۤنْ بُودَاكْ نُو لِيَانْ ۞ تَفِى تَرَا كُوْمَاڬُوْڠَانْ

فَرَاڠِنَا كَڠْجۤڠْ نَبِى ۞ جَتْنِكَا فِنُوهْ كُو فُوجِى

فِنْتۤرْ تُورْ ڬۤدَىْ كَاوَانِىْ ۞ صَبَرْ، ۑَاأَهْ كَا سَاسَامِىْ

كۤرْ اَوْفَةْ تَهُونْ يُوسْوَانَا ۞ دِىْ بۤرۤسِيَهانْ مَنَهْ نَا

نَبِى دِىْ بۤلَاهْ دَادَانَا ۞ مَلَائِكَةْ نُوْ مۤلَاهْنَا

جِبْرِيلْ كَا دُوَا رَينْچَڠْ نَا ۞ مِيْكَائِيْلْ جۤنۤڠَانْ نَنَا

ڠۤسِكۤنْ كَانَ مَنَهْ نَا ۞ عِلْمُ حِكْمَهْ سَا فِنُوهْ نَا

تُوْلُوْيْ دَادَا كَڠْجۤڠْ نَبِى ۞ ڬَنْچَاڠْ دِى رَافۤتْكۤنْ دۤئِى

سَرْتَا تۤ ڠَارَئَوسْ چۤرِيْ ۞ دِىْ حَفْ كُوْ خَاتِمِ النَّبِيْ

هَرِتَا نَبِى اَيَنَا ۞ دِى لۤمْبُورْ إِبُو إِنَاڠْ نَا

حَلِيمَهْ جۤنۤڠَانْ نَنَا ۞ سَعْدِيَهْ ڠَارَانْ لۤمْبُورْنَا

رَامَا نَبِى كَاچَاتُورْكۤنْ ۞ فُوْفُوْسْ نَا كَاچَرِيئَوْسْكۤنْ

بَسَا نَبِى دِىْ بَوْبَوْتْكۤنْ ۞ دُوَا سَاسِهْ كَا اُوْڠْڬَالْكۤنْ

كۤرْ لِمَا تَهُونْ يُوسْوَانَا ۞ دِى تِڠْڬَالْ فُوفُوسْ اِبُونَا

تُولُويْ دِى رَوَاتْ اَيْيَڠْنَا ۞ عَبْدُ الْمُطَلِبْ اَسْمَنَا

كۤرْسَانَا رَبُّ الْعَالَمِينْ ۞ كَڠْجۤڠْ نَبِى نُو فۤرِهَتِينْ

يُوسْوَا دَلَفَانْ تَهُونْ يَقِينْ ۞ اَيْيَڠْنَا مُوْلِيهْ كَا بَطِينْ

سَابَعْدَ وَفَةْ اَيْيَڠْنَا ۞ نَبِى دِى رَوَاتْ اُوْوَانَا

اَبِى طَالِبْ كَاكَسِهْنَا ۞ سَدَيِرَيكْ تۤڬۤسْ رَمَانَا

كَڠْجۤڠْ نَبِى سۤرِڠ٘ فِسَانْ ۞ دِى چَنْدَاكْ كَا نَڬَارَا شَامْ

سَوْكْ ۑَنْدَاكْ بَرَاڠْ دَڬَاڠَانْ ۞ دِىدِيْۑَا تَيهْ فَجۤڠْ فِسَانْ

كَاچَتُورْ دِى اَيتَ نۤڬۤرِىْ ۞ لَوْبَا فۤنْدَيْتَا يَهُودِى

سَرْتَا فۤنْدَيْتَا نَصْرَانِي ۞ نُوْ تۤفَاڠْ جۤڠْ كَڠْجۤڠْ نَبِى

سَدَيَنَا سَسَائُورَانْ ۞ اِيۤ جَلْمِ مَوئَلْ ۑَلَاهَانْ

فِنَابِيۤنْ اَخِيْرْ زَمَانْ ۞ تَوْرَةْ اِنجِيلْ تَوسْ ڠَابَرَانْ

صِفَةْ نَبِى فَڠَڠْڬۤسَانْ ۞ اَيَا دِى اَنْجۤنَا فِسَانْ

هَرِتَا لَوبَا نُو اِيْمَانْ ۞ كَا نَبِى ڠَڠْكۤنْ فَنُوتَانْ

لَامِى-لَامِى كَڠْجۤڠْ نَبِى ۞ دِى سَمْبَةْ كُو هِجِى إِسْتۤرِىْ

دَڬَڠْ نَا كَا اُوڠْڬَالْ نۤڬۤرِيْ ۞ كَا اُونْتُوڠَانْ نَا دِى بَڬِىْ

إِسْتۤرِى جۤنۤڠَانْ خَدِيْجَةْ ۞ فُتْرِا حُوَيْلِيْدْ كَا تۤلَهْ

نُوْ فَڠْ بۤڠْهَرْنَا دِى مۤكَهْ ۞ كَا نَبِى كَا لَڠْكُوڠْ ۑَاأَهْ

سِتِى خَدِيْجَهْ مَسْرَاهَنْ ۞ كَا نَبِى بَرَاڠْ دَڬَاڠَانْ

مَيْسَارَةْ نُو ڠَارَيْنْچَڠَانْ ۞ كَا نَبِى فُورَاهْ ۑَرۤڠَانْ

كَچَارِيئَوسْ مَيْسَارَةْ تَيْهْ ۞ لَوبَا فَمۤنْدَاكْ نُو اَنَيْهْ

چِچِيْرَيْنْ نَبِى نُو صَالَيْحْ ۞ مَتَكْ ڠَا هَيْرَانْكۤنْ كَبِيْهْ

تَتَڠْكَلَانْ اُولُوكْ سَلَامْ ۞ مَيْڬَا بَوْدَاسْ سَوْكْ مَايُوڠَانْ

جۤڠْ اَيَا چَفْ كَا نَبِى يَانْ ۞ دِيْنَا سَلِرَ نَا فِسَانْ

فَمۤنْدَاكْ سِتِي خَدِيْجَةْ ۞ چَوْچَوْكْ فِسَانْ جۤڠْ مَيْسَارَةْ

اَخِيْرْناَ سِتِى خَدِيْجَةْ ۞ كَا نَبِى مُونْدُوةْ دِى تِكَاحْ

هَرِتَا يُوسْوَ نَا نَبِى ۞ سَلَاوَيْ تَهُونْ كَا وَرْتِى

ڠَدَاكْ-ڠَدَاكْ سُوْڬِيْهْ مُكْتِى ۞ تَفِى تَمْبَاهْ سَائَىْ اَتِىْ

كَارۤسۤفْنَا كَڠْجۤڠْ نَبِى ۞ كَا ڬُسْتِى اَللهْ ڠَا بَكْتِى

دِى ڬُنوُڠْ حِرَا مَرَانْتِى ۞ عِبَادَهْنَا سَبَانْ وۤڠِىْ

دِىدِيْۑَا جَولْ كَا سُومْفِڠَانْ ۞ جِبْرِيْلْ نُوْ نُورُنْكۤنْ قُرْآنْ

كَلَوَانْ دَاوُهْ فَڠَيْرَانْ ۞ نَبِى دِىْ دَامۤلْ اُتُوسَانْ

هَرِتَا يُوسْوَنَا نَبِى ۞ فَةْ فُولُوهْ تَهُونْ كَا وَارْتِى

دِى اُتُوسْ كُو اَللهْ فَسْتِى ۞ ڠَيْمْبَارْكۤنْ اَڬَمَا سُوْچِيْ

اَنُو اِيْمَانْ فَڠْ هۤلَانَا ۞ سِتِي خَدِيْجَهْ ڬَرْوَا نَا

اَبُوبَكَرْ كَا دُوَانَا ۞ صَحَابَةْ نُوْ فَڠْ مُولْيَانَا

مُورَڠْكَالِيهْ نُوْ نَوْنَوْمَانْ ۞ اَنُو فَڠْ هۤلَانَا اِيْمَانْ

سَيِّدِنَا عَلِى فِسَانْ ۞ كَا نَبِى سَادَيْرَيْكْ مِسَانْ

جۤڠْ اَرِى جَلْمَ بۤلِيْيَانْ ۞ اَنُو فَڠْ هۤلَانَا اِيْمَانْ

سَيِّدْ نَا بِلَالْ كَالۤرۤسَانْ ۞ اَنُو جَدِى تُوكَڠْ اَذَنْ

اَرِىْ لَوْلَوْبَنَا فِسَانْ ۞ كَا نَبِى تَيْهْ ڠَامُوسُوهَانْ

ڠَانِيَايَا ڠَاجَئِيْلَانْ ۞ تۤ اَيَا فِسَانْ رَسْرَاسَنْ

فۤرَا صَحَابَةْ كُوڠْسِىْ ڠَالِيْهْ ۞ كَا نۤڬۤرِيْ حَبْشِىْ نُو تۤبِيْهْ

دِيدِيۑَا اَنْجۤنْنَا لِڠْڬِهْ ۞ كِرَا كَيْڠِيْڠْ تِلُو سَاسِيهْ

سَمُولِيهْ صَحَابَةْ تِى حَبْشِي ۞ كَچَرِئَوسْ كَڠْجۤڠْ نَبِى

كَيْڠِيْڠْ فَوْهَارَا چَوْچَوْبِىْ ۞ كۤرْسَنَا نُوْ مَهَا سُوْچِىْ

اُوَانَا سَرۤڠْ ڬَرْوَأنا ۞ فَدَا فُوْفُوْسْ دُوْا نَنَا

هَرِتَا نَبِى يُوْسْوَانَا ۞ كَالِمَا فُولُوهْ تَهُونْ نَا

ڬۤسْ فُوْفُوسْ سِتِى خَدِيْجَهْ ۞ نِكَاهْ كَا سِتِى سَوْدَهْ

سَرۤڠْ كَا سِتِى عَائِشَهْ ۞ اُمِّ الْمُؤْمِنِينْ كَا تۤلَهْ

تِدِۑَا كۤرْسَا فَڠَيْرَانْ ۞ مَفَارِنَانْ كَا مُلْيَائَنْ

كَا نَبِى نُو اَخِيْرْ زَمَانْ ۞ كَاكَسِيْهْ نُوْ صِفَةْ رَحْمٰنْ

نُجُو تَڠْڬَالْ تُجُوهْ لِكُورْ ۞ كَڠْجۤڠْ نَبِى تَيْهْ دِىْ سَائُورْ

نُوْرُوْةْ قَوْلْ اَنُوْ مَشْهُوْرْ ۞ كَڠْجۤڠْ نَبِى تَيْهْ دِىْ سَائُوْرْ

دِىْ فَفَاڬْ كُوْ مَلَائِكَةْ ۞ ۑَنْدَاكْ بُوْرَقْ نُوْ كَاسۤبَتْ

لۤمْفَڠْ نَاتَيْهْ چَرَا كِلَاتْ ۞ تُوْڠْڬَاڠَانۤنْ نَبِى اَڠْكَاتْ

تِى مۤكَهْ كَا بَيْتُ الْمَقْدِيْسْ ۞ تۤ ڠَڠْڬَوْ لَامِى اَنْتَاوِيْسْ

كُوْ جَلْمِ هۤنْتۤ كَاتَوِيْسْ ۞ كۤرْسَانَا ڬُوسْتِى نُوْ وَچِسْ

تِىْ بَيْتَ الْمَقْدِسْ تۤرَسْنَا ۞ نَائَيْكْ نَا تَڠْڬَا كَنْچَنَا

مِعْرَاجْ تَيْيَا كَا سۤبَتْنَا ۞ كَا لَڠِيْتْ نَبِى سُوْمْفِڠْنَا

تُجُوهْ لَڠِيْتْ سَدَايَنَا ۞ جۤڠْ عَرَشْ نُوْ فَڠْ لُوْهُوْرْنَا

دِىْ سُوْمْفِڠَانْ سَدَيَنَا ۞ كَاتُوتْ سُورْڬَا نَرَاكاَنَا

كَڠْجۤڠْ نَبِى دِىْ تِمْبَالَانْ ۞ كُوْ ڬُوْسْتِى نُوْ صِفَةْ رَحْمٰنْ

اَنْجۤنْ نَا كُوْدُوْ نۤتۤفَانْ ۞ صَلَاةْ مُوْجِ كَافَڠَيْرَانْ

كَبَيْهْ جَلْمَ اَنُوْ اِيْمَانْ ۞ سَامْى فَدَا كَوَاجِبَانْ

صَلَاةْ نُو لِمَا ڬِيْلِيْرَانْ ۞ هۤنْتۤ مۤنَاڠْ دِىْ كُوْرَاڠَانْ

صَلَاةْ اَيْتَ مِنَڠْكَانَا ۞ دِيْنَا اَڬَامَ تِهَڠْنَا

جَلْمَ نُوْ لُوْفُوْتْ صَلَاةْ نَا ۞ ۑَتَا رُوْبُوْهْ اَڬَامَ نَا

كَچَرِئَوسْ دِيْنَا زَمَانْ ۞ مِعْرَجْ نَا نَبِى فَنُوتَانْ

يُوسْوَانَا تَيْهْ كَلۤرۤسَانْ ۞ لِمَا فُوْلُوْهْ دُوَا جَلَانْ

كَافِرْ مۤكَهْ كَچَتُوْرْكۤنْ ۞ بَرَاڠْ نَبِى ۑَرِيْئَوْسْكۤنْ

مِعْرَاجْ لَئِنْ دِىْ مُلْيَاكۤنْ ۞ اَڠْڬُورْ فَدَا ۑۤڠْسۤرِيكۤنْ

فَدَا حَسُدْ ڠَكَالَكۤنْ ۞ تِدِۑَا اَللهْ ڠۤرْسَكۤنْ

كَڠْجۤڠْ نَبِى دِىْ أَلِيْهْكۤنْ ۞ كَا مَدِيْنَهْ دِى سِرْنَكۤنْ

فۤرَا صَحَابَةْ فِيْرَاڠْ-فِيْرَاڠْ ۞ نُو بُوْمَيْلَا مِيْلُوْ اِيْيَاڠْ

مِيْلُوْ ڠَالِيْهْ سَيْوَاڠْ-سَيْوَاڠْ ۞ هۤنْتۤ فِسَانْ سُمُوْرَيْيَاڠْ

تَمْبَاهْ كَا مُلْيَئَنْ نَبِى ۞ دِىْ مَدِيْنَهْ اَصَلْ سۤفِيْ

جَدِيْ رَمَيْ كُوْنُوْ ڠَاجِى ۞ مُوْجِىْ كَانُوْ مَهَا سُوْچِىْ

سَفُوْلُوْهْ تَهُوْنْ لَامِنَا ۞ دِىْ مَدِيْنَهْ جُوْمۤنۤڠْ نَا

اَڬَامَ اِسْلَامْ چَهْيَا نَا ۞ ڬُوْمۤبْيَارْ كَا مَنَا-مَنَا

نۤڬۤرِىْ مۤكَهْ دِىْ فۤرَاڠَنْ ۞ اَخِرْنَا كَا بَوْيَوْڠْ فِسَانْ

نَبِى تَمْبَاهْ كَا مُلْيَائَنْ ۞ يَقِيْنْ لَائِنْ جِجِيْيۤنَانْ

اَرِىْ يُوْسْوَا كَڠْجۤڠْ نَبِى ۞ ڬۤنۤفْ فُوْلُوْهْ تِلُوْ فَسْتِىْ

مَقَمْ نَا دِىْ جۤرَوْ نَڬْرِىْ ۞ مَدِيْنَهْ نۤكَارَا سُوْچِيْ

فُوْفُوْتْرَانَا كَڠْجۤڠْ نَبِى ۞ اَيَا اَوْفَةْ اَنُوْ اِسْتۤرِيْ

سِتِى زَيْنَبْ نُوْ كَا هِجِى ۞ رُقَيَهْ نُوْ هِجِى دۤئِىْ

اُمِّ كُلْثُومْ كَا تِلُوْنَا ۞ سِتِى فَاطِمَهْ بُوْڠْسُوْنَا

اَرِىْ فُوْتْرَا نُوْ چِيْكَالْ نَا ۞ سَيِّدْ نَا قَاسِمْ كَاكَسِهْ نَا

سَيِّدْ نَا عَبْدُاللهْ رَائِي نَا ۞ اِبْرَاهِيْمْ نُوْ كَاتِلُوْنَا

اَيْتَ نُوْ ڬۤنۤفْ فُوْتْرَا نَا ۞ سِتِى خَدِيْجَهْ اِيْبُوْنَا

سَيِّدْ نَا اِبْرَاهِيْمْ اِيْبُونَا ۞ مَارِيَهْ چۤنۤڠَانْ نَنَا

اِسْتۤرِىْ تِىْ مۤصِيْرْ اَصَلْ نَا ۞ تَهْ كِيْتُوْ تُوْرُوْنَانْ نَنَا

فُوْتْرَا نُوْ فَمۤڬۤتْ كَابَيْهْ ۞ فُوْفُوْسْ كۤرْ اَرَلِيْتْ كَيْنَيْهْ

نُوْ اِسْتۤرِيْ چَرَوْڬَيْ نَا تَيْهْ ۞ فَرَا صَحَابَةَ نُوْ صَالِيْحْ

سِتِى زَيْنَبْ چَرَوْڬَيْ نَا ۞ اَبُوالْعَاصْ جۤنۤڠَانْ نَنَا

سِتِى رُقَيَهْ چَرَوْڬَيْ نَا ۞ سَيِّدْنَا عُثْمَانْ مِمِتِنَا

ڬۤسْ سِتِى رُقَيَهْ هِلَاڠْ ۞ اَنْجۤنْ نَا تُوْرُوْنْ كَا رَنْجَاڠْ

اُمِّ كُلْثُوْمْ فُوْتْرِىْ لَنْجَڠْ ۞ دِىْ تِكَاحْ ڬۤنْتَوْسْ نُوْ هِلَاڠْ

چَرَوْڬَيْ سِتِى فَاطِمَهْ ۞ سَيِّدْنَا عَلِى نُوْ كَا تۤلَاهْ

بَكَرَّمَ اللهُ وَجْهَهْ ۞ اَنُوْ كَا مَشْهُوْرْكۤنْ ڬَاڬَهْ

اَرِىْ فُوْتُوْ كَعْجۤڠْ نَبِى ۞ دَلَفَنْ فَامۤڬۤةْ اِسْتۤرِىْ

سِتِى اُمَامَهْ جۤڠْ عَلِى ۞ تِى سِتِى زَيْنَبْ كَا وَرْتِىْ

اَرِىْ سَيِّدْنَا عَبْدُ اللهْ مَهْ ۞ فُتُوْ تِى سِتِى رُقَيَهْ

فُتُوْ تِىْ سِتِى فَاطِمَهْ ۞ اَيَا لِمَا كَابَيْهْ نَا مَهْ

تِلُوْ اَنُوْ فَمۤڬۤةْ نَا ۞ سِدْنَا حَسَنْ ڬَاكَسِهْ نَا

سِدْنَا حُسَيْنْ كَا دُوَا نَا ۞ سِدْنَا مُحْسِنْ كَا تِلُوْ نَا

اُمِّ كَلْثُوْمْ نُوْ اِسْتۤرِى نَا ۞ كَا سِدْنَا عُمَرْ نِكَاحْ نَا

سِتْنَا زَيْنَبْ كَا دُوَا نَا ۞ نُوْرُوْتْ اُوْڠْڬۤلِيْڠْ وَرْتَوْسْ نَا

اُوْرَاڠْ كۤوْدُوْ چِنْتَا اَتِى ۞ كَا تُوْرُوْنَانْ كَڠْجۤڠْ نَبِى

فَوْمَا اُوْلَهْ ڬَوْرَيْڠْ اَتِى ۞ سُوْمَا وَوْنَا حِرِىْ دۤڠْكِىْ

اَرِىْ مُوْڠْڬُوْهْ كَڠْجۤڠْ نَبِى ۞ ۑَائَهْنَا لَڠْكُوْڠْ تِى مِسْتِى

كَا اُمَّةْ نَا جَلۤرْ اِسْتۤرِىْ ۞ لۤوِيْهْ تِى سۤفُوْهْ فۤرِيْبَدِىْ

وۤلَاسْ اَسِيْهْ كَنُوْ مِسْكِيْنْ ۞ سُمَاوَوْنْ كَا بُوْدَاكْ يَتِيْمْ

فَدَا سۤبۤهْ كُوْ فَفَارِيْنْ ۞ كَدَاهَرَانْ جۤڠْ فِى سَلِيْنْ

اَكُوْوَانْ كَا اُوْرَاڠْ كَمْفُوْڠْ ۞ چَلِيْكْ سَا تَتَا ڠَارِيُوْڠْ

تَرَ اَڠْكُوْهْ چۤڠْ اَدِيْڬُوْڠْ ۞ سَنَجَانْ كَا اُوْرَاڠْ ڬُوْنُوْڠْ

كَانُو ۑَنْدَاڠْ كَاسُوْسَاهَانْ ۞ ڬۤرِيْڠْ جۤڠْ كَافَفَاتَيْنَانْ

ڠَالَيَادْ سَرْتَا ڠُوْبَرَانْ ۞ ڠَاجَاجَفْكۤنْ كَا قُبُوْرَانْ

مَانِسْ سَائُوْرْ مَانِسْ بُوْدِىْ ۞ اَيْسْتُوْ مُوْسْتِكَانِيْڠْ جَلْمِ

سَجَاڬَةْ مَوْئَلْ مۤنْدَاكْ دۤئِىْ ۞ سَائَىْ رُوْفِىْ چۤڠْ فَرَاڠِىْ

رَارَيْ لِيْرْ بُوْلَانْ فُوْرْنَمِى ۞ حَلِسْ نَا لِيْرْ كَتُوْمِرِيْ

وَائَوْسْ لِيْرْ اِنْتۤنْ بِدُوْرِىْ ۞ سَلِرَا هَارُوْمْ وَاوَاڠِيْ

اَيْسْتُوْ كۤرْسَنِڠْ فَڠَيْرَانْ ۞ لَئِنْ سۤڠِيْتْ دِىْ مِۑَاكَانْ

كَرِيْڠَاةْ فَدَا نَنْدَيْيَانْ ۞ دِىْ فَرَاكَيْ سۤسۤڠِيْتَانْ

سَكِتُوْ نَبِى مُلْيَا نَا ۞ تَيَا فِيْسَانْ اَدِڬُوْڠْنَا

اَڠْكَاةْ فُوْڠْكُوْرۤنْ صَحْبَةْ نَا ۞ كَالَڠْكُڠْ هَنْدَافْ اَسَوْرْنَا

اَڠْڬَوْئَنْ كۤرْسَ لُوْمَيَانْ ۞ نَجَنْ نُوْ ڬۤسْ دِىْ تَمْبَالَنْ

كِتُوْ دۤئِىْ كَاتُوَاڠۤنْ ۞ بَڠۤةْ فِسَانْ دِىْ كُوْرَاڠَانْ

بۤتَهْ دِيْنَا كَا مِسْكِيْنَانْ ۞ لَئِنْ سَبَابْ تۤ كَا ڬُوْڠَانْ

ڠَهَجَا بَئَىْ ڠِرَاڠَانْ ۞ ڠَرَاهْ كَا رِضَائَنْ تُوْهَانْ

فِرَاڠْ-فِرَاڠْ مُعْجِزَةْ نَا ۞ تَوِسْ كَا نَبِيَنْ نَنَا

قُرْآٰنْ نُوْ نَوْمۤرْ هِجِى نَا ۞ مُعْجِزَةْ نُوْ فَڠْ مُلْيَأ نَا

تَڠْكَالْ نُوْ فَيْرَاڠْ دَائُوْنْ نَا ۞ دِىْ سِيرَامْ تِلَاسْ اَبْدَاسْ نَا

ڠَدَادَاكْ لَوْبَا بُوْوَاهْنَا ۞ سَرْتَ هِيْرُوْفْ سَتُوْلُوْيْ نَا

دَوْمْبَأ نُوْ بَڠۤتْ كُوْرُوْأ نَا ۞ سَرْتَنَا لَيْفَيْتْ سُوْسُوْ نُا

دِىْ اُوْسَافْ كُوْ فَنَاڠَنْ نَا ۞ ڠَدَادَاكْ جُوْئُوْهْ سُوْسُوْنَا

دِيْنِا هِجِى وَقْتَوسْ دۤئِى ۞ صَحْبَةْ كَا كِرَاڠَانْ چَائِيْ

تۤرَاسْ بَئَىْ كَڠْجۤڠْ نَبِى ۞ مُوْنْدُوْتْ چَائِى اَنُوْ كَارِىْ

چاَئِيْ ڠَانْ سَكَاتَيْلْ فِسَانْ ۞ تَيَا دۤئِيْ اَنُوْ لِيَانْ

نَبِى نۤلۤمْكۤنْ فَنَاڠَانْ ۞ دُوْمَدَاكْ تُوْلُوْيْ مَنْچۤرَانْ

چَائِىْ مَنْچۤرْ لَوْبَا فِسَانْ ۞ كَلُوَارْ تِنَا فَنَاڠَانْ

سۤلَاسۤلَا رَمَوْ فِسَانْ ۞ چُوْكُوْفْ كُوْ جَلْمَ رَيْبُوْئَنْ

كَاچَتُوْرْ هِجِى بۤدۤوِىْ ۞ ڠَدَوْجَا كَا كَڠْجۤڠْ نَبِى

نِيَةْ ۑَئُوْرْ تَڠْكَالْ كَائِىْ ۞ سِنَا ڠَوْمَوْڠْ چَرَا جَلْمِ

تُوْلُوْيْ تَڠْكَالْ تَيْهْ دِىْ سَائُورْ ۞ هَرِتَا كُوْ كَڠْجۤڠْ رَسُوْلْ

تَڠْكَالْ دَاتَڠْ ڠَاڬُوْلُوْسُوْرْ ۞ اَكَارْنَا تَيْهْ دِىْ ڬُوْڬُوْسُوْرْ

ڠَادۤهۤسْ كَا كَڠْجۤڠْ نَبِيْ ۞ اُوْلُوْكْ سَلَامْ چَرَا جَلْمِ

سَڠْڬۤسْ كِتُوْ بَالِكْ دۤئِيْ ۞ كَا تۤمْفَةْ اَصَلْ نَا تَدِىْ

بَدْوِىْ تَيْهْ ڠَانْ كَنْتُوْنْ هَيْرَانْ ۞ نِڠْڬَالْ اَيْتَ كَااَنَيْهَانْ

تُوْلُوْيْ بَائَيْ اَسُوْفْ اِسْلَامْ ۞ كَا نَبِيْ ڠاَڠْكۤنْ فَنُوْتَانْ

سَالِيَانْ نَا لَوْبَا دۤئِيْ ۞ مُعْجِزَةْ نَا كَڠْجۤڠْ نَبِى

مُوْنْ دِىْ وِنْچِكْ هِجِى-هِجِى ۞ كۤرْ نُوْلِيْسْ نَا مَوْئَلْ مَاهِىْ

هَىْ اَللهْ نُوْ صِفَةْ رَحْمَٰنْ ۞ عِبْدِىْ سَدَيَنَا اِيْمَانْ

تۤ اَيَا دۤئِيْ فَڠَيْرَانْ ۞ لِيَانْتِىْ اَنْجۤنْ نَا فِسَانْ

نُوْ ڠَادَامۤلْ بُوْمِى عَالَمْ ۞ رَاْوُهْ سَاأۤسِنَا فِسَانْ

نُوْ وَجِبْ دِىْ عِبَادَهَنْ ۞ تَيَا اَنُوْ ۑَسَامَيَانْ

سَرۤڠْ عَبْدِىْ اِيْمَانْ دۤئِىْ ۞ كَا سِدْنَا مُحَمَّدْ نَبِىْ

يَيْنْ اَيْتَ اُوْتُوْسَانْ ڬُسْتِىْ ۞ مِوُوْلَڠْ سَدَيَا جَلْمِ

نُوْ صِفَةْ كَافۤرْچَيَائَنْ ۞ بِجَكْسَنَا تُوْرْ بُوْدِيْمَانْ

بۤنۤرْ اُوْڠْڬَالْ سَاسَئُوْرَانْ ۞ نَجَانْ سَئُوْرْ كَا هۤرۤيَانْ

ڠَيْمْبَرْكۤنْ ڬَڠْجۤڠْ نَبِى تَيْهْ ۞ كَا جَلْمِ سَادُنْيَا كَابَيْهْ

دَاوُهْ فَڠَيْرَانْ نُوْ صَاحِيْحْ ۞ نُوْ وَاجِبْ دِيْ تُرُوْتْ نَا تَيْهْ

هُرْمَةْ اُوْرَاڠْ كَا اَنْجۤنْ نَا ۞ دِيْنَا مَڠْسَا جُوْمۤنۤڠْنَا

سَرۤڠْ سَبَعْدَا وَفَتْ نَا ۞اَيْتَ تۤ اَيَا بَيْدَا نَا

دُوْهْ ڬُوْسْتِى جُڠْجُوْنَانْ عَبْدِىْ ۞ سِدْنَا مُحَمَّدْ حَبِيْبِىْ

فَمُوْڬِيْ سَلِيْرَا نَمْفِىْ ۞ كَا نُوْ هِنَا دِيْرِيْ عَبْدِىْ

عَبْدِى اُمَّةْ اَخِيْرْ زَمَانْ ۞ اَنُوْ بَاڠۤةْ فَنَاسَرَانْ

هَوْيَوْڠْ تۤفَاڠْ ڠَادۤهۤسَانْ ۞ سۤجَأ تُمُوْةْ سرَاهْ بَدَانْ

دِىْ يَوْمِ الْاَخِيْرْ فَمُوْڬِىْ ۞ عَبْدِى سِڠْ جَنْتۤنْ ڠَاهِجِى

سَرۤڠْ اِنْدُوْڠْ بَفَأ عَبْدِىْ ۞ ڠِرِيْڠْ ڬُوْسْتِىْ كَا سَوَارْڬِىْ

..: تَمَّتْ وَاللهُ اَعْلَمْ :..